වර්ෂ 1960 දී  පමණ කුඩා පොල් අතු මඩුවක මෙම විද්‍යාලය ආරම්භ වූ බවට වාචික තොරතුරු ඇත. රජයෙන් වැටුප් නොලබා පාසල පවත්වාගෙන ගොස් ඇති අතර මුල් ගුරුවරයා ලෙස නාකියාදෙණිය ප්‍රදේශයෙන් පැමිණි පියසිරි නමැති මහතෙකු කටයුතු කර ඇත.

     ප්‍රදේශයේ ග්‍රාම සංවර්ධන සමිතියේ මැදිහත් වීමෙන් 1961 වසරේ දී මෙම පාසල රජයට පවරාගෙන ඇති අතර ඒ වන විට පාසලක් රජයට පවරා ගැනීම සඳහා අවම වශයෙන් සිසුන් 35ක් වත් සිටිය යුතු වූ බැවින් ගමේ වැඩිහිටියන්ගේ සහ ග්‍රාම සංවර්ධන සමිතියේ පිරිස්, ප්‍රදේශයේ නිවෙස් කරා ගොස් අවශ්‍ය ශිෂ්‍ය සංඛ්‍යාව සපුරාගත් බව කියැවේ.

    එතැන් සිට ක්‍රමයෙන් දියුණු වූ පාසල පොල් අතු මඩු වෙනස් වෙමින් ස්ථිර ගොඩනැඟිලි ඉදිවෙමින් ගුරු හා සිසු සංඛ්‍යාව වර්ධනය වෙමින් අ.පො.ස. සාමාන්‍ය පෙළ විභාගය දක්වා පන්ති පැවැත්වෙන මට්ටමට පත්ව ඇත. මේ වන විට මෙම පාසල  සමස්ත ලංකා, දකුණු පළාත්, කලාප මට්ටමේ ජයග්‍රහණ රැසක් අත්පත් කර ගනිමින් ප්‍රදේශයේ කීර්තිමත් පාසලක් ලෙස සමාජයට මහඟු මෙහෙවරක් ඉටු කරමින් ඇත.